داونلۆدی ڤێرژنی PDF

هەرێمی كوردستان - عێراق، بە ڕەچاوكردنی ڕووبەر و شوێن و مێژووەكەی، بە بەراوردكرنی دراوسێ و چواردەورەكەی، نیشتمانێكی فرە ئاینییە، چەندان ئاین و باوەڕی تێدا ژیاوە و دەژی، ڕیشەی هەندێک ئاین لەم هەرێمەوە چەكەرەی كردووە و هەندێ ئاینیش تەنیا لەم سنوورەدا هەن و پەرستشە ئاینییەكانیان دەكەن. پەیوەندیی ئەم ئاینانە پێكەوە، پەیوەندییەكی ئاڵۆزە، لە زۆر كاتدا پێكەوە هەڵیان كردووە و ژیاون، لە هەندێک كاتیشدا بەریەك كەوتوون و ململانێیان بووە. لە ناوخۆی ئاینەكانیشدا، هەر ئاینێكی ئەم ناوچەیە تایبەتمەندیی خۆی هەیە و هەر هەمووشیان بە شێوەیەك ماتەوزەی یار و نەیاریی ئازادیی ئاین و باوەڕیان تێدایە.

ناوەندی كوردستان بۆ یاسای نێودەوڵەتی (KCIL)، لە چوارچێوەی پرۆژەیەكدا مەبەستییەتی كار بۆ فراوانكردنی زیاتری ئازادیی ئاین و باوەڕ لە هەرێمی كوردستاندا بكات. بۆ ئەم مەبەستەش ئەم ڕێبەرەی ئامادە كردووە و دەیكاتە هەوێنی زنجیرەیەك كار و چالاكیی تر. ئەم ڕێبەرە بە شێوەیەكی سەرەكی لەلایەن دوو پسپۆڕەوە نوسراوەتەوە و تەریب بە نووسینەكەش، لە پێناو دەوڵەمەندتركردن و جێكردنەوەی سەرنج و بۆچوونی ئەوانی تر، گرووپێكی كاركردنی بۆ دامەزراوە. ئەم گرووپە كە پێك هاتبوون لە دادوەر و پارێزەر و چالاك و كەسانی ئاینی لە ئاینە جیاوازەكان، بە سەرنج و بۆچوون و پێداچوونەوەكانیان، ڕێبەرەكەیان گشتگیرتر و مانادارتر كرد. ئەم ڕێبەرە وەك یەكەم ڕێبەر لەسەر ئازادیی ئاین و باوەڕ بە زمانی كوردی، ڕەنگە بێ خەوش نەبێت، بەڵام دەستپێكێكی گرنگ دەبێت بۆ قسەكردن لەسەر ئازادیی ئاین و باوەڕ لە هەرێمی كوردستاندا.