ناوەندی کوردستان بۆ یاسای نێودەوڵەتیی بە هاوکاری وەزارەتی دەرەوەی ئەڵمانیای فیدڕاڵ مەبەستیەتی پڕۆژەی (زەمینەسازی بۆ بەناوخۆییکردنی یاسای تاوانی نێودەوڵەتیی لە کوردستان)دا جێبەجێ بکات، پڕۆژەکە لەسەر دوو ئاستی سەرەکی کاردەکات:

یەکەم؛ بەرزکردنەوەی ئاستی هۆشیاری گشتی لە ڕێگەی وەرگێڕانی یاسا پەیوەندیدارەکان بە یاسای تاوانی نێودەوڵەتیی.

دووەم؛ بەرزکردنەوەی توانای کەسانی ناو دەسەڵاتی دادوەری و دەسەڵاتی یاسادانان لە کوردستان لە ڕێگەی ئاشنایی کردنیان بە بنەما نوێکانی یاسای تاوانی نێودەوڵەتیی لە ڕێگەی خولی ڕاهێنانەوە.

پڕۆژەکە ڕاستەوخۆ لەگەڵ ئەندامانی پەڕلەمان و دادوەر و داواکاری گشتی و نوێنەری پێکهاتەکانی کوردستان و شارەزایانى تایبەت بەو بوارە کاردەکات. بۆ زیاتر بەهێزکردنی پڕۆژەکە، ناوەند لە ڕێگەی ئەکادیمییە ناوخۆیی و بییانیەکانەوە پشتگیری زانستی تایبەت بە یاسای تاوانی نێودەوڵەتییان بۆ فەراهەم دەکات.

ناوەندی کوردستان بۆ یاسای نێودەوڵەتیی لە ڕێگەی ئەم پڕۆژەیەوە لەم قۆناغەدا تەنها مەبەستیەتی زەمینەسازی بکات و هەوڵی بەرزکردنەوەی توانای کەسانی ناو دەسەڵاتی دادوەری و یاسادانان و شارەزایان و بەرزکردنەوەی ئاستی هۆشیاری گشتی بدات.