لە زمانى کوردیدا زۆرجار ئەم چەمکە بە پاکتاوى ڕەگەزى، پاکتاوى نەژادى یان پاکتاوى نەتەوەیی ناویهێنراوە، بەڵام درووسترین چەمک پاکتاوى ڕەچەڵەکییە، چونکە ڕەچەڵەک دەکرێت بە مانای ڕەگەز و نەژاد بێت و دەکرێت بازنەیەکى بچووکتریش بێت لە ڕەگەز و نەژاد، هەروەها زۆرجاریش ئەم چەمکانەش لە برى وشەى جینۆساید بەکاردەهێنێرێت، کە نەک دروست نییە، بەڵکو زۆریش پێچەوانەى مانا و ناوەڕۆکى جینۆسایدە.

ئەم جۆرەى تاوان هەتا ئێستا؛ نە پەیماننامەیەکى لەسەرە، نە پێناسەیەکى جێگیر و تایبەت بە خۆى هەیە. زۆرجار وەک گوزارەیەکى سیاسى بەکاردەهێنرێت، بەڵام لە ناو گۆڕەپانى یاسای نێودەوڵەتیشدا گفتووگۆى لەسەرکراوە و زیاتر بە ماناى ڕاگواستنى بە کۆمەڵى ڕەچەڵەکێک دێت، دادگاى دادى نێودەوڵەتى لە دادبینى نێوان بۆسنا و هەرسک بەرانبەر سڕبیا و مۆنینیگرۆ تایبەت بە پەیماننامەى جینۆساید، پێناسى پاکتاوى ڕەچەڵەکى کردووە بە:
"ڕاگواستنى خەڵکانێکى چوونیەک لە ناوچەیەکى جوگرافى دیاریکراودا، لە رێگەى ترساندن و بەکارهێنانى هێزەوە."